Aproveitando o Día das Letras Galegas, subimos un documentario de Xosé Bocixa onde Lois Dieguez, Xurxo Souto, F. Xosé Fernández Naval, Antía Otero, X. R. Freixeiro Mato, Dores Tembrás, Estibaliz Espinosa, Pilar Pallarés, Ánxeles Penas e Marcelino Fernández Mallo, 10 voces das actuais letras galegas, reflexionan en alto sobre a situación, pasado e presente do idioma galego no momento actual
Este ano os estudantes de 2º Bach. do IES Agra de Leborís terán unha información máis ao miúdo sobre o acceso á universidade, dos itinerarios a escoller ou a superación da proba de acceso. Tamén sobre os ciclos superiores recibirán suficiente información, en caso de optar por esa alternativa educativa. Para iso, igual que o ano pasado, contarán co asesoramento da actual presidenta da ANPA, Loli Fernández Vázquez, xefa de sección de intervención na Universidade da Coruña.
A cita terá lugar, na tarde do luns 19 de maio, no IES Agra de Leborís, durante os actos a celebrar co alumnado de bacharelato.
A razón do cambio con respecto ao ano pasado, sobre a metodoloxía a utilizar, é debido a que a información que reciban pode ser moi distinta á que reciba o alumnado de 2º Bacharelato do vindeiro ano escolar, pois os decretos gubernamentais van producir cambios no sistema educativo, e tamén na universidade. Por iso non se vai falar en xeral para todo o alumnado, senón, que vai, especificamente, para os que están en 2º Bach. neste ano.
A Plataforma Galega en Defensa do Ensino Público, na que a nosa anpa está integrada, acordou o pasado 25 de abril, entre as medidas a levar a cabo contra o Real Decreto Lei 14/2012, apoiar a folga e as mobilizacións convocadas polas organizacións estudantís e xuvenís para mañá xoves 10 de maio. Co lema “O ensino é un dereito, non un privilexio” esixiráselle á Xunta de Galiza que non aplique a suba de taxas proposta polo Goberno de Madrid.
Na concentración da Plataforma Galega en Defensa do Ensino Público, na que participamos varias anpas, denunciouse que as medidas aprobadas polo Goberno central, véñense a sumar aos recortes a aplicados pola Xunta de Galiza no ensino público. Estas medidas reaccionarias buscan masificar, aínda máis, as aulas (incrementar o número de alumnado por aula), reagrupar alumnado de diferentes niveis educativos nunha mesma aula e reducir a oferta educativa e eliminar prazas de profesorado dos centros. Todas estas medidas dificultan o acceso á educación das clases sociais máis desfavorecidas, van contra a calidade do ensino e significan maior fracaso escolar.
Ao final da concentración liuse, por parte dos diferentes colectivos que formamos a plataforma o manifesto da Plataforma Galega de Defensa do Ensino Público
O martes, 8 de maio, participaremos na concentración, que se vai realizar na praza Pontevedra da Coruña, para demandar do Goberno galego o cese dos recortes no ensino público galego. Con estas mobilizacións, a Plataforma Galega en Defensa do Ensino Público Galego (da que forma parte a nosa asociación) inicia o calendario de accións que teñen como obxectivo evitar a aplicación no noso país do Real Decreto-Lei 14/2012, mal chamado de medidas urxentes de racionalización do gasto público no ámbito educativo.
A Plataforma Galega en Defensa do Ensino Público Galego, constituída en autoconvocatoria o pasado 25 de abril, está integrada por representantes da comunidade educativa galega, pais e nais, profesorado e alumnado, a través de diferentes entidades.
A plataforma permanece aberta a novas adhesións individuais e colectivas que poden formalizarse no enderezo electrónico http://plataformagalegadefensaensinopublico.blogspot.com.es/ .
A anpa do IES da Laracha asistiremos á reunión da Plataforma Galega en Defensa do Ensino Público. Consideramos que, como a Xunta de Galiza ten competencias plenas no ensino (mentres que o neoliberalismo no termine coa educación pública e voltemos á escola do Ferrado) debemos participar, desde a nosa comarca, nunha plataforma que reivindique o dereito das galegas e galegos a un ensino público, gratuíto e de calidade.
É preciso sumar esforzos nesta loita que sen descanso debemos enfrontar para evitar o deterioro do ensino público.
Por tal motivo convocamos, en réxime de autoconvocatoria, a todas as organizacións e entidades que conformamos a Plataforma Galega en Defensa do Ensino Público, así como a calquera outra entidade (ANPA, organización estudantil, …) que queira acudir a esta reunión para constituír e botar a andar a Plataforma Galega en Defensa do Ensino Público da Coruña.
A reunión terá lugar no local da Asociación Cultural Alexandre Bóveda ás 19 horas do luns 7 de maio:
Agrupación Cultural Alexandre Bóveda
Olmos, 16-18, 1º
Tlf. 981 200 869
15003 A Coruña
Presentamos este venres a nosa camisola oficial. A autora é unha alumna do instituto, 
Antía de la Fuente Rey, quen realizou o debuxo tomando como referencia o cadro impreso na frontal do instituto e o escudo oficial da Laracha.
Aparecen todos os elementos do escudo municipal pero, seguindo unha filosofía artística propia do descontructivismo, á balea do escudo oficial engádenselle os dentes en forma de teclado de piano, as ondas do mar son máis vivas, o castelo ten na lingua a estrela da liberdade e o trigo está en todo o seu esplendor.
As 200 camisetas, de dous tipos (entalladas e rectas) e diversas tallas, estarán expostas no centro escolar e serán entregadas a quen o desexe a prezo de custo (6 euros). Pódense conseguir contactando co alumnado do centro ou a través do correo electrónico do ANPA.
As primeiras foron entregadas como agasallo, este pasado venres 17, aos estudantes que participaron na comparsa no entroido do IES.
Asociación de nais e pais do IES Agra de Leborís
Estimadas familias do IES Agra de Leborís:
Convocámolos á Asemblea Xeral Ordinaria que se celebrará o venres 10 de febreiro ás 20:00 horas en primeira convocatoria, e ás 20:30 horas en segunda convocatoria, na Casa de Cultura da Laracha, para tratar asuntos do ámbito educativo e información relativa ao traballo desenvolvido até o momento na asociación. Ás 22:00 horas rematará a asemblea.
A orde do día é a seguinte:
1. Aprobación, se procede, da acta da sesión anterior.
2. Información do número de socias e socios.
3. Vindeiras actividades educativas e extraescolares.
4. Protección de datos.
5. Camisetas da ANPA.
6. Conferencias Universidade e ciclos formativos.
7. Información sobre SAL.
8. Rogos e preguntas.
Aproveitamos esta ocasión para animar a todas as nais e pais a que asistan á reunión para tratar sobre asuntos que poden afectar á educación das nosas fillas e fillos.
Contando coa súa asistencia, reciban un atento saúdo.
